ညဏ်ရည်တုနည်းပညာ အကူအညီဖြင့် လူတို့၏ မျက်နှာပေါ်တွင် ဖော်ပြသော စိတ်ခံစားမှု အရိပ်အကဲအား ဖတ်ရှုလေ့လားခြင်းမှာ မှန်ကန်တိကျမှု မရှိနိုင်ဘဲ မလိုလားအပ်သော ခွဲခြားဆက်ဆံမှုများ သို့သာ ဦးတည်သွားနိုင်ကြောင်း စိတ်ခံစားမှု အထူးပြု လေ့လာသူ စိတ်ပညာရှင်တို့က ဆိုလိုက်သည်။ Northeastern University ၏ စိတ်ပညာဌာန ပရော်ဖတ်ဆာ Lisa Feldman Barrett က လုပ်ငန်းရှင်များအနေဖြင့် ထိုသို့သော နည်းပညာရပ်များမှာ ယေဘုယျအားဖြင့်သာ မှန်နိုင်ကြောင်း သုံးသပ်သည်။

သူမက သုံးသပ်သည်မှာ ညဏ်ရည်တုနည်းပညာသည် လူသားအားလုံး၏ အခြေခံ စိတ်ခံစားမှုကြောင့် ပေါ်ထွက်လာသော မျက်နှာအရိပ်အကဲ ပြောင်းလဲမှုပေါ် အခြေခံထားခြင်းဖြစ်ရာ လူတစ်ဦးချင်းနှင့် ထိုလူ၏ ယဉ်ကျေးမှု ထုံးတမ်းစဉ်လာအား တွက်ချက်ခြင်းမရှိသဖြင့် ရလဒ်များ၏ တိကျမှုမှာ အာမခံချက်မရှိဟု ဆိုသည်။ ထို့ကြောင့် အလားတူနည်းပညာများမှာ အသုံးမပြုသင့်ကြောင်း ဝေဖန်ပြောကြားခဲ့သည်။

နာမည်ကြီး Amazon မှလည်း သူတို့တီထွင်ထားသော Rekognition အမည်ရှိ မျက်နှာအရိပ်အကဲ ဖတ်ရှုမှု ညဏ်ရည်တုနည်းပညာမှာ အခြေခံ စိတ်ခံစားမှု ခုနစ်မျိုးကြောင့် ဖြစ်ပေါ်သော မျက်နှာရိပ်ကို အကဲဖြတ်နိုင်သည်ဟု ဆိုပြန်သည်။ ဗြိတိန်အခြေစိုက် Unilever ကုမ္ပဏီမှလည်း အလားတူ နည်းပညာ အသုံးပြု၍ အလုပ်ခန့်အပ်မှု အင်တာဗျူးများအား ပြန်လည် အကဲဖြတ်ခြင်းအားဖြင့် အလုပ်ချိန် စုစုပေါင်း ၁ သိန်းခန့် သက်သာစေခဲ့သည်ဟု ဆိုသည်။

မည်သို့ပင်ဆိုစေကာမူ စိတ်ပညာရှင်များ၏ ရှုထောင့်ဖြစ်သော လူတစ်ဦးချင်းနှင့် ထိုလူ၏ ယဉ်ကျေးမှု ထုံးတမ်းစဉ်လာပေါ်မူတည်၍ တူညီသော ခံစားမှုဖြစ်ပေါ်လင့်ကစား ကွဲပြားသော မျက်နှာအရိပ်အကဲ ပုံဖော်မှု ရှိနိုင်ကြောင်း ဝေဖန်မှုမှာ အထောက်အထားများအရ အတော်အသင့် ခိုင်မာကြောင်းဆိုသည်။

ကိုးကား – The Guardian (AI systems claiming to ‘read’ emotions pose discrimination risks)